منسم 1

مسيتوا بالخير للي عندهم صبح .. وصبحتو باللخير اللي عندهم مغرب


كالعاده دوغري من دون توقف .. ندخل في قصتنـا ..

بس عاد قبل لاندخل أبي يكون خيالك وااااسع وتطلق خيالك المغبر معي لأن القصه فيها من نوع من الخيال اللي مايدخل المخ .. وفي الآخر والأخير انها مجرد [ قصـه ]!!ـ


تـاريخ القصـه عـام / 1756 ميـلادي

شخصيات القصه / منسـم ، صعفـق

احداث القصه / الديرهـ ( بادية ريشه أبو دريشه )، ـ



~~~~~~~~~~~~~~~~~~~~~~~


في صباح يوم مظلـم وفي ديرتـن متنتفـه اسمها ( بادية ريشه أبو دريشه ) وانا جالس اربرب على الربابه واقهوي أبوي .. قلت له أسمع أنت وشنبك اللي واصل خيمـة جارنا صعفق من طوله .. انا رجال الحمد الله عندي خبرات وتقنيـات وشهادات ومؤهلات ويعني بصفتي اثقـف واحد في البـاديه لأني احمل شهادة ثالث ابتدائي ليلي .. فـ قررت أني اروح للعاصمه اكون مستقبلي واتوظف وأتسنـع مع الناس .. مليت كل يوم غنم غنم غنم غنم .. الى متى وانا اربيك .. عفواً أربي الغنـم .. ( وهو يناظر فيني وانا اهايط وماسك الفنجال ) يوم شفت الدعوه كذا قلت : تقهـوو طال عمرك .. واجلس شوي ويتجمعـون عندنا جحلط الباديـه في خيمتنا .. ويسولفون عن الأوضاع الأقتصاديه في الباديه وانها في انحدار شديد بسبب انخفاض البنك المركزي الأمريكي .. وانخفاض الأقتصاد في دول العالم .. والصرراحه انغثيت من هالسوالف البايخه قلت أشقلب الموضوع بالخيمه لموضوع ثاني .. واقول لهم يالربع .. عندي سؤال بصفتي من عرفت أبوي وانا في ديرة ريشه أبو دريشه .. قالوا أسأل يامنسـم .. قلت لهم : اللحين ليه أسم باديتنا ريشه أبو دريشه .. ليش ماسموها : سولاف فاخرجي على أسم الباديه اللي جنبنا .. نط واحد قديم بالديرهـ .. من أيااااام الجاهليه أسمـه ( مطحس )< كاتبين تحت أسمه في بطاقه الأحوال باللون الأحمر ماده كيميائيه قابله للأنفجار ..



قال هذي ديرتنا سميت على أسم بطل أسمه ريشه .. قاطعته قلت : بطل وأسمه ريشه ؟ واالله ياأ( مط مط ) ماهي راكبه .. ويجيني فنجال يمشي 7 مليون من آخر الخيمه .. ( لأنه عيب عند القبيله أنك تستهزيء برجالها القدامى ) .. ويكمل قال : ريشه هذا كان انسان متنتف وطفران عنده اربع روؤس من الغنم وكان راعي بس اذا شرب الحشيش يطلع اذكى واحد واثناء جلوسه تحت شجره وهو يحشش .. قرر أنه يغزي على ديرة كامله ( بدون أسم ) .. ويوم جهز سيفـه وعد عدته جاء يركض للديره يبي يغزي ويمسكونه ورعان الديره ويجلدونه جلد لين قال للعنـز / يااااخااله << مشكله اللي يجي متحمس ... ويسجنونه .. ويخيس بالسجن .. وبعد 55 سنه من سجنه اكتشف ان السجن له دريشه ؟؟ ونط معها وذبح شيخ الباديه وفزعوا معه مجموعه باكستانيه سواقين ليموزينات في الباديه .. وتوحدت الباديه على يد المغفور له ( ريشه أبو دريشه ) .. يعني نقدر نقول المسمى { أسم البطل ريشه ونط مع دريشه السجن } .. وسمي ريشه أبو دريشه .. ويوم خلص كلامه .. رجال الباديه في الخيمه كلهم في وضـع فهاوهـ .. وانا معهم .. ( يووه اجل ساكنين في بادية واحد قوي )ـ .. قلت لهم طيب واللي يروح الحين ويغزي على باديـه ( سولاف فاخرجي ) وينقل ملكيتهـا من عند مرور الريـاض ويخليهـا بأسم ( منسم أبو الفتوح )ـ



ويضحكون واسمع كل واحد يقول ( ياحليله بزر , ياحليله خفيف دم , ياحليله هالهتوفي مسوي زحمه .. الخ )ـ قلت وقتها مقولتي الشهيرهـ [ فـ واللهِ لن أخذ غطه وارتاح حتى شسمه تصير بادية منسم أبو الفتوح ]ـ .. ويجي العصر واروح للغنـم واجلس اخطط .. حتى أني حاط دائرهـ حولي من التيـوس واتخيل أنهم رجال باديه سولاف فاخرجي .. ومن بيالة شاهي لـ بياله ثانيـه .. وخذ لك تخطيط .. حتى أني طحت بالحشيش عشان أصير مثل أبو دريشه .. واثناء التخطيط والتدبير .. شطفوني مجموعه من التيـوس والخرفـان .. وبينهم اكبر خروف اللي هو الأخ صعفق .. قلت صفط الغنـم في المواقف وتعـال .. ويجي قلت له السالفه وانا لازم أستعمر باديه سولاف فاخرجي .. لأن رجال الباديه يحسبوني زلابه مثلك .. قال قداام انا معك .. المهم واجمع 66 بـزر في حارتنا ( عاطلين عن العمل ) قلت لهم بكرهـ الساعه 7 المغرب عندنا استعمار على باديه جنبنـا ونبي ذيابه وجحوش مثلكم .. ويجي بكرهـ الظهر .. قلت للوالده والاأهل على الغداء .. انا بررب مسافر لـ مكه وبرجع بعد يوميـن .. ويجي المغرب ونتجمع في وادي أسمه ( وادي الزلايب ) < لا اسم يجيب العافيه .. قلت لهم الكنـق حقكم انا أقول سوو كذا تسوون .. واسوي خطه ( 4-4-2 ) < خطة المنتخب السعودي اللي ماتغيرت من كأس العالم 94م ..



المهـم .. وندزها كعابي لباديه سولاف فاخرجي ويوم وصلنا على حدود الباديه الا ( الشنبات ورجال الباديه واقفين يحرسون الحدود ) .. واجيهم انا والربع يوم شفت الدعوه كذا واطلع العجرهـ .. ويوم جيت القـط أقرب واحد ويمسكوني وخذ لك جلد جلد جلد ليـن تبخر من رأسي فكرة الأستعمـار .. ويمسكوننا كلنا .. ويدخلونا على شيخ الباديه ( سمير توفيق فاخرجي ) .. قالوا : هالزلايب يبغـون يزعزعون استقرار امن الباديه وبيستعمرونها .. قلت له ياشيخ لاتفهم غلط .. هذا مجرد مقطـع نبي نصوره في باديتـكم عن سيرة البطل هتلر الألماني وكذا .. وبعدين ترى الدعوه عوافي .. ماصار شيء ولاأحد فطس ولا فيه اصابات الحمد الله .. قال : ودوهـم السجن المركزي للباديه .. قلت له : لو سمحت مانبي سجن مركزي .. نبي سجن فيه دريشه .. عشان أصير مستقبلاً ( منسم أبو دريشه ) .. ويناظر فيني قال هذا حطوه في سجن الحيـوانات عشان مايهايط على شيوخ الباديه .. ونخيس في السجن ويجي أبوي يطلعني كفاله بعد ماأنتشر خبر السجن في كل الباديه والبوادي اللي جنبنا حتى أني شفت مكتوب على جـدار خيمـه .( لا لا لا للمخدرات , لا لا لا لـ منسم )ـ وراسمين صورة ( اسامه بن لادن وصورتي جنبه وانا ابتسم )ـ .. وصرت متصدر القائمه السوداء في البوادي اللي متناثرهـ يمين ويسار باديتنا



.. وتبخر من رأسي سالفة الهياط وفكرة أني اروح اهايط على بادية سولاف فاخرجي . وقررت احط رجلي للعاصمه ومعي صعفق .. والحمد الله ضبط الوضع ومسكنا خط انا وصعفق للعاصمه ( جلسنا 9 شهور نمشي لأن مافيه الا حميـر ) .. حتى أني بالخط رحمت الحمار وقلت في قلبي الحمار له فايده بس صعفق الي معي ماله فايده واحط صعفق واركب فوق واكمل المشوار .. المهـم .. يوم وصلنا الرياض .. الا العالم تحتفل باليـوم الوطني .. ( وش السااالفه يالربع ؟ ).. واكتب على ظهر صعفق ( فهد في قلوبنا ) .. ونتمشى في شوارع الرياض القديمه ووسط الرياض ويوقفونا الدوريات .. قالوا الأخ محشش ولا سكران .. قلت لا والله معك ( منسم أبو دريشه ) والأخ ( صعفق بدون دريشه ) .. من بادية ( ريشه أبو دريشه ) .. < لو تجمع الأسامي تطلع غرفـه .. وينلحس العسكري .. قال اركب أنت وياه ويودينا قسم الملـز .. وندخل غرفة التحقيق والضابط يشوف ظهر صعفق مكتوب عليـه ( فهد في قلوبنا ) .. قال اللحين عصر الملك عبدالله ؟ وش تحسون فيه انتو ؟ ومن وين جايين ؟ ووين كنتوا عايشين ؟ .. قلت له ياطويل العمر .. حنا عايشين في السعوديه في بادية ريشه أبو دريشه تقـع في الجنوب الشمالي من المملكه .. يحدها شمالاً نجران وجنوباً الكويت .. وشرقاً حايل وغرباً تونس


.. وبعدين سالفه الملك فهد والملك عبدالله .. ترى الدعوه وانا اخوك وحده الملك فهد المل عبدالله كلهم الله يطول بأعمارهم كانوا ملوك ..وبعدين ماعندكم وظايف ترى انا اثقـف واحد في باديتنا .. وانسان اكـــــد على باديه كامله .. وان شاء الله أنك توظفنا ونسوي مشاريع استثماريه في باديتنا ونرد لك الجميل .. قال يالله يالله برى بلا جميل بلا طـه زكي . تووكل على الله .. ويكرفسـونا برى القسم .. ونروح نحط روؤسنا عند مكتب العمل عشان أول مايفتح الا وانا أول المتوظفين < بدري ,, وننتظر الى بكره الصباح ويفتح المكتب وادخل على أول واحد قلت أسمع أنت ترى سبق وان حاولت أستعمر باديه كامله لاتردني ولا قسم بالله لأستعمر وزاره العمل كلها مو مكتبكم هذا اللي كأنه خيمـه أبو صعفق 4 × 6 وينااااظر الموظف وهو مستغرب قال هات شهاداتك ومؤهلاتك .. واعطيـه شهادتي ( ثالث ابتدائي ليلي ) .. ويوم شاف ختم شيخ الباديه غسل يدهـ .. قال يأبوي أنت سعودي قديم شكلك بس ترى تصلح في حراسة المنشآءت .. قلت له حراسة منشآءت .. حراسه بقالات .. حراسه بوابات .. حراسه مشاغل نسائيه .. ماعندك مشكله أهم شيء أتوظف .
ونطلع من المكتب .. وبعد يومين راجعناهم وتوظفنا انا وصعفق حراس آمن في هايبر بنـده .. وجمعنا مبلغ كبير .. والحمد الله صرت انا ويا الكمخه صعفق من حراس آمن الى كاشير ( حاميها حراميها ) ومن شفت الفلوس والبيـع زاد الطمع كبر في داخلي ( يعني اكبر من رأس صعفق بـ شوي ) .. وخططت انا وصعفق قلت دام الله ماوفقنا في استعمار باديه سولاف فاخرجي .. اكيد اننا بنتوفق في نتـف الفلوس .. ونحط رجولنا للباديه .. وبعد اربـع سنوات من التخطيط .. سرقنا الفلوس .. والبااااااديه على طول .. ويوم جيت الباديه أول من أستقبلني في مطار الباديه الوالد وابو صعفق والأهل والجماعه وحتى أنه جاء حشود من باديه سولاف فاخرجي والبوادي اللي جنبنا ( شكلهم سامعين بقناة الجزيره أني سارق فلوس ) .. وكل شيخ باديه يحلف علي أني أتقهوى عنده .. حتى أن أبوي بدل مايصرف لي محطتين بالعقال قام يصرف لي ابتسامات .. وجمعتهم في خيمتنا .. واجلس بصدر المجلس ( طلعت شيخ ) قلت لهم أسمعوا ياجحلط البوادي وياسكان البوادي .. انا الحمد الله جمعت ثروه هائله من الفلوس .. حتى أني مستعد ادفع دياتكم كلكم وماتروح ربع الفلوس .. فـ عشان هالمبلغ انا راح اسوي لكم مشاريع استثماريه وسياحيه في الباديه بس بشرط انها تكون البوادي كلها متوحده في أسم واحد وهي باديه ( منسم أبو دريشه )ـ وشيوخ البوادي تلونت وجيههم .. ( صعبه شيخ يتنازل عن قريته على حساب واحد كان متنتف ) ..ـ



قالوا وغير هالشرط .. قلت غير هالشرط يالله كل واحد بيت أمه ولأحد يقول نبي مشاريع ونبي سياحه .. قالوا طيب نخليك وزير السياحه قلت والله لو تحطوني وزير الداخليه ماأبي ياأكون شيخ وعمك أنت وياه ولا أقلب وجهك ولا أشوف رقعـة وجهك مرتن ثانيـه .. وبعد مرور السنين اتفقـوا على أني اكون شيخهـم وتوحـدت كل البـوادي المجـاوره تحت أسم ( باديه منسم أبو دريشه )ـ وصرت انا عمهم .. وتم تعيين ( شيخ باديه سولاف فاخرجي ) مدير مدرسه ثانويه في الباديه و أبو صعفق ( سفير الباديه في التشيك )
وابوي ( سفير الباديه في الرياض ) وصعفـق ( ولي العهـد والمفتش العام ووزير الدفاع والطيران ووزير الزراعه والنفط والماليه ووزير الصناعه ووزير العمل ووزير التربيه والتعليم ومدرس فسحه ) .. وفتحت مشاريع سياحيه وحطيت لهم دوار عند مدخل البـاديه على شكل ( صعفق واقف يصب قهوه لي وانا جالس )والحمد الله توسعت الباديه وفتحنا لهم ملاهي الحكير وملاهي الشلال وقرية مرسال ( الجنقل لاند ) .. وضبطنا العلاقات الدوليـه ( الباديه - امريكا ) والعلاقات الداخليـه .. وصرنا شعب مطنوخ .. ومنسم في نفس الوقـت ..

منـاظر من التطـور في باديه [منسم ابو دريشه]ـ

يسللللللمو